Наурыз айында өткен үш апталық ҰБТ барысында 88 мыңға жуық талапкер тест тапсырды. Олардың 72%-ға жуығы шекті балды жинады. Жалпы тестілеу нәтижесінде орташа көрсеткіш 65 балды құрады (бес пән бойынша). Ең жоғары нәтиже – 139 балл, оны Алматы қаласы мен Шығыс Қазақстан облысының екі талапкері еншіледі.
Тестілеуге қатысушылардың 70,7%-ы қазақ тілінде, 29,2%-ы орыс тілінде, ал 100 адам ағылшын тілінде тест тапсырды.
Пәндер комбинациясы бойынша ең көп таңдалған бағыт – «Математика-Физика» (18,1%). Одан кейін «Биология-Химия» (14,8%) және «Шығармашылық емтихан» (12,6%) тұр. Ең сирек таңдалған пәндер жұбы – «Химия-Физика», бұл комбинацияны тек 105 талапкер таңдаған.
Ерекше білім беру қажеттіліктері бар талапкерлер үшін жасалған қолайлы жағдайлар нәтижесінде биылғы наурыз ҰБТ-сына 232 талапкер қатысты.
Тестілеу аяқталғаннан кейін талапкерлер 30 минут ішінде апелляцияға өтініш бере алады. Сертификат апелляция қаралған соң талапкердің жеке кабинетінде жарияланады.
Қазіргі таңда 121 талапкердің нәтижесі жойылды. Оның ішінде:
- 43 адам тыйым салынған құрылғылар (смартфон, шпаргалка) қолданбақ болғаны үшін,
- 55 адам тестілеу барысында ережелерді бұзғаны үшін аудиториядан шығарылды,
- 23 адамның сертификаты тест бейнежазбасын тексеру нәтижесінде жойылды.
ҰБТ-ның әділдігін қамтамасыз ету мақсатында 2025 жылғы тестілеу аяқталғаннан кейін 31 қазанға дейін барлық бейнежазбалар тексеріледі. Егер тәртіп бұзу фактілері анықталса, талапкердің нәтижесі жойылады.
Айта кетейік, биылғы наурыз ҰБТ-сы 1 наурыз бен 6 сәуір аралығында өтеді. Оған 163 мыңға жуық талапкер қатысуға өтініш білдірген.
