Қызылорда облысы Жаңақорған ауданындағы №286 орта мектептің 6-сынып оқушысы Нұрсері Айтжан адам өмірін қорғауға арналған қауіпсіз лифт жобасын ойлап тапты.
Статистикаға қарағанда, Қазақстандағы әрбір төртінші лифт қауіпті болып табылады, олардың көпшілігі жөндеуді немесе толық ауыстыруды қажет етеді. Бұл жағдай лифттердің қауіпсіздігіне кепілдік бермейді.
Нұрсері Айтжанның жобасында қауіпсіздік мәселесі ерекше назарға алынған.
— Қазіргі таңда лифт тростары әлсіз, олар үзіліп кетсе, адамды аман алып қалу қиын. Сондықтан мен автокөліктерде қолданылатын қауіпсіздік жастығын лифтке орнатуды ұсындым. Егер қандай да бір ақау пайда болса, жастық ашылып, адам өмірін сақтап қалуға көмектеседі, — деді Нұрсері.
Оқушы көркем еңбек пәнінің мұғалімдері Өркен Ақбаев, Құдабай Тастанбеков, Ерлан Райымбек және робототехника мұғалімі Айдос Арасаттың көмегімен су диірмені, суүсті көпірі секілді басқа да ерекше жобаларды іске асырды.
