Қазақстанда ғылымға негізделген аумақтарды дамыту жобасы жалғасуда. Бұл туралы Ғылым және жоғары білім министрі Ресей ғылым академиясының (РҒА) Сібір бөлімшесінің делегациясымен кездесу барысында айтты. Делегацияны РҒА вице-президенті, Сібір бөлімшесінің төрағасы Валентин Пармон басқарды.
Кездесу ғылыми-техникалық ынтымақтастықты нығайту және жоғары технологиялық экожүйелерді дамыту тәжірибесімен алмасуға арналды. Қазақстандық тарап ресейлік ғылым қалашықтарының даму үлгісімен мамыр айында Новосібірге сапар барысында танысқан болатын.
Министрдің айтуынша, ғылым қалашықтары – білім, ғылым, өндіріс және жайлы өмір сүру ортасын біріктіретін инновациялық экожүйелер. Бұл жоба Президент Қасым-Жомарт Тоқаевтың ғылымды жедел дамыту жөніндегі тапсырмасы аясында жүзеге асырылып келеді.
– Ғылым мен инновация – елдің жаңа экономикалық бағытының негізгі өзегі. Қазір елімізде 27 146 ғалым бар, олардың 47%-ы – жас зерттеушілер. Зерттеу және тәжірибелік-конструкторлық жұмыстармен 423 ұйым айналысады, – деді министр.
Кездесу барысында Сібір бөлімшесінің өкілдері өңірдің инновациялық даму моделі – «Лаврентьев тетраэдры» қағидасымен таныстырды. Бұл модель ғылым, білім және өндіріс үштігіне қоса, мемлекеттік басқаруды тұрақты ғылыми-технологиялық экожүйенің маңызды құрамдас бөлігі ретінде қарастырады.
Кездесу соңында Валентин Пармон министрді академик Гурий Марчуктың 100 жылдығына арналған мерейтойлық медальмен марапаттады. Сонымен қатар тараптар ғылыми-техникалық ынтымақтастықты әрі қарай дамытуға және ғылым қалашықтарын құру саласында тәжірибе алмасуға уағдаласты.
