Қасым-Жомарт Тоқаев Astana Hub инновациялық экожүйесіне сапар шекті. Президентке Nur Alem ғимаратында орналасатын AIemai жасанды интеллект орталығының тұжырымдамасы таныстырылды.
Цифрлық даму, инновациялар және аэроғарыш өнеркәсібі министрі Жаслан Мәдиевтің айтуынша, орталықтың құрамында Tomorrow School мен Tumo Education мектептері ашылады. Бұл жерде жыл сайын мыңдаған оқушыға бағдарламалау, робототехника және басқа да креативті технологиялар бойынша білім беріледі, сондай-ақ 1000 жоғары білікті маман даярлау жоспарлануда. AIem.ai халықаралық орталығы стартаптар акселерациясы мен зерттеу жобаларын қолдауға арналған кампус ретінде қызмет етеді.
Президентке инкубация және акселерация бағдарламаларына қатысатын, болашағы зор отандық стартаптар мен компаниялар жайында ақпарат берілді. Олардың қатарында тұтынушылармен байланыс орнатуға арналған дыбысты роботтарды әзірлеуге маманданған Cybernet.ai және иммунды терапия мен диагностика салаларында жұмыс істейтін ArlanBiotech компаниялары бар. Сондай-ақ, перспективалы Higgsfield AI стартапы ғалымдар мен инженерлерге күрделі компьютерлік модельдерді үйретуге арналған озық жүйе жасады.
Мемлекет басшысына Tik-Tok пен Netraсker компанияларының еліміздегі қызметі жайлы мәліметтер ұсынылды. Салық жеңілдіктері, визалық қолдау және басқа да қолайлы жағдайлар арқасында шетелдік компаниялар мен ІТ-мамандар Astana Hub экожүйесіне қосылуда. Қазіргі таңда Telegram, TON, Tether, Google, EPAM сынды әлемдік ІТ-өкілдіктерімен бірлескен ғылыми-зерттеу жобаларын жүргізу және жаңа өнімдер әзірлеу мақсатында келіссөздер жүргізілуде.
Президентке жасанды интеллект саласындағы отандық өнімдер таныстырылды. Олардың қатарында кен орындарының цифрлық моделі, дрондарды басқару және өндіріске арналған робот-ит сияқты индустриалдық шешімдер бар.
Қасым-Жомарт Тоқаев жасанды интеллекттің болашағы жайлы ой бөлісіп, Қазақстанның ІТ саласында зор әлеуеті бар екенін атап өтті. Ол білім мен инновацияға негізделген экономиканы қалыптастырудың маңыздылығын тілге тиек етіп, технология мен экономиканың алдыңғы қатарлы ел болу үшін адам капиталы мен цифрландыруды дамытуға баса назар аударуды ұсынды.
Президент Жолдауында Ұлттық жасанды интеллект орталығын құру туралы айтқан болатын, енді оның халықаралық мәртебеге ие болып, аймақтағы жасанды интеллектті дамыту орталығына айналуы керектігін айтты. Alem.ai халықаралық орталығы Қазақстанның цифрлық трансформациясының символына айналып, ғылыми және тәжірибелік зертханалар, бағдарламалау мектебі мен халықаралық технологиялық компаниялардың кеңселерін қамтуы тиіс.
Сонымен қатар, Президент мемлекет тарапынан жасанды интеллект саласын дамыту үшін институционалдық орта қалыптастырудың маңыздылығын атап өтіп, Жасанды интеллектті дамыту тұжырымдамасын қабылдауды тапсырды. Бұл ретте саланың қауіп-қатерлерін ескере отырып, жасанды интеллектті жауапкершілікпен қолдану қағидаттары мен этикалық аспектілерін заң жүзінде бекіту қажеттілігі туралы айтты.
Қасым-Жомарт Тоқаев әлемдік нарықтағы есептеу ресурстарының тапшылығына назар аударып, осы салада заманауи инфрақұрылым қалыптастыруға және киберқауіпсіздік мәселелерін шешуге бағытталған шаралар қабылдауды тапсырды. Сондай-ақ, деректерді цифрлық форматқа көшіру мен жүйелеу жұмыстарын жалғастыруды, мемлекеттік, бизнес және азаматтық секторының жасанды интеллект моделдеріне қол жеткізуін қамтамасыз етуді ұсынды.
Мемлекет басшысы жасанды интеллект саласындағы мамандарды даярлау, сондай-ақ Қазақстанның әрбір тұрғынына жасанды интеллекттің пайдасын түсіндіру үшін бағдарлама әзірлеуді тапсырды.
