Биыл еліміздегі мектептерде дәстүрлі түрде 34 аптаға созылған оқу жылы өз мәресіне жетуде. 2024–2025 оқу жылын Қазақстан бойынша 3,9 миллионнан астам оқушы аяқтайды. Оның ішінде 217 мыңнан астам 11-сынып оқушысы мектеппен қоштасқалы отыр.
Оқу жылының соңғы күні – 23 мамырда барлық білім ордаларында «Білімім — Отаныма» атты бірыңғай сынып сағаты өткізіледі. Бұл іс-шара оқу жылын қорытындылап, оқушылар мен мұғалімдердің бірлескен жетістіктерін еске түсіріп, патриотизм мен білімге құштарлықты дәріптеуге бағытталған.
Айта кетейік, 11-сынып бітірушілер үшін соңғы қоңырауға арналған салтанатты шара биыл демалыс күніне сәйкес келгендіктен, мектеп әкімшілігінің шешімімен 23 немесе 24 мамырда өткізіледі.
Білім беру ұйымдарына мерекелік іс-шараларды тек мектеп қабырғасында ұйымдастыру тапсырылды. Сән-салтанатқа, ақша жинауға, автокөлікпен шеру жасауға және басқа да сыртқы шараларға тыйым салынады. Бұл шешім барлық оқушы үшін тең жағдай мен қауіпсіз ортаны қамтамасыз ету мақсатында қабылданған.
