2025 жылы қайта қабылданған Білім беру стандарты ел мектептерінде қазақ әдебиетімен қатар орыс әдебиетін де оқытуды жалғастыруды көздейді. Бұл жөнінде Оқу-ағарту министрлігінің Kazinform ақпарат агенттігіне берген жауабында айтылған.
Министрліктің мәліметі бойынша, 2025 жылғы 23 қаңтардағы №12 бұйрықпен бекітілген жаңа мемлекеттік негізгі орта білім беру стандартына сәйкес, білім беру ұйымдары қазақ әдебиеті мен орыс әдебиетін міндетті пәндер ретінде оқытумен бірге, әлем әдебиетін вариативті компонент есебінен енгізу мүмкіндігіне ие болады. Әлем әдебиеті пәнін оқыту вариативті компонент сағаттары арқылы жүзеге асырылуы мүмкін.
Бұл вариативті компонент педагогтың қалауы бойынша оқушылармен жүргізілетін шығармашылық жұмыстарды қамтиды, және әлем әдебиеті бағдарламасын мұғалім өзі дайындайды.
Қазіргі уақытта қолданыстағы мемлекеттік білім беру стандарты бойынша әлем әдебиеті пәні оқытылмайды. Бірақ вариативті компонентті енгізу мүмкіндігі болған жағдайда, мектеп мұғалімдері әлем әдебиеті пәнінің бағдарламасын өздері әзірлей алады. Сонымен қатар, оқулықтар мен оқу бағдарламалары типтік стандарттарға сәйкес баспалар арқылы дайындалады.
