ҚР Ғылым және жоғары білім вице-министрі Дархан Ахмед-Заки «Болашақ» бағдарламасы аясында ғылыми олимпиадалардың жеңімпаздары қандай жолмен бакалавриатқа түсе алатынын түсіндірді.
Бұл бағдарлама талантты жастарды қолдауға және еліміздің адами капиталын дамытуға бағытталған.
- Гранттар беруді республикалық комиссия жүзеге асырады, бұл механизм олимпиада жеңімпаздары үшін де қолданылады. Талапкерлер жеңімпаз екенін растайтын дипломды тапсырады. Содан кейін олардың өтініштері ұлттық тәуелсіз комиссиямен қаралып, барлық шешімдер республикалық комиссияның қарауына беріледі. Осылайша, «Болашақ» бағдарламасы арқылы оқуға жіберу шешімі қабылданады, – деді Д. Ахмед-Заки Сенатта журналистердің сұрақтарына жауап бере отырып.
Вице-министрдің айтуынша, талапкерлерге ұсынылатын жоғары оқу орындарының тізімі «Болашақ» бағдарламасына үміткер басқа студенттермен бірдей болады.
- Ең маңыздысы, осы жерде олимпиадалардың арнайы тізімі анықталады. Бұл тізімде физика, математика, информатика және инженерия бойынша халықаралық олимпиадалар қамтылады, – деп атап өтті ол.
Еске сала кетсек, бүгін Сенаттың жалпы отырысында «Қазақстан Республикасының кейбір заңнамалық актілеріне мәдениет, білім беру және тәлімгерлік мәселелері бойынша өзгерістер мен толықтырулар енгізу туралы» Заңы қабылданды. Заң аясында халықаралық олимпиадалар мен конкурстарда жеңіске жеткен талантты оқушыларға «Болашақ» бағдарламасы арқылы шетелдегі үздік жоғары оқу орындарына бакалавриатқа түсу мүмкіндігі ұсынылады.
