Қазақстанда алғаш рет жасанды интеллектіні терең меңгерген оқушылар арасында олимпиада өткізілді. Бұл шара Алматы қаласындағы Республикалық физика-математика мектебінің филиалында ұйымдастырылды.
Олимпиаданың алғашқы іріктеу кезеңі 10 қарашада онлайн түрде өткізілді. Іріктеуге 8-12 сынып оқушыларынан тұратын 450 команда қатысты. Оның ішінде Беларусь пен Қырғызстаннан келген командалар да болды.
Іріктеу кезеңінен өткен 52 команда Алматыдағы физика-математика мектебіне жиналды. Астана, Алматы, Ақтөбе, Аягөз, Қарағанды, Қызылорда, Талдықорған, Шымкент қалалары мен Түркістан облысынан келген қатысушыларға еліміздің танымал сарапшылары дайындаған 6 есептің шешімін табуға 4 сағат уақыт берілді. Қатысушылар өздерінің машиналық оқыту модельдерін жасап, оларды «Физмат» мұғалімдері арнайы әзірлеген бағдарламамен тексерді.
Олимпиаданың қорытындысы бойынша бірінші орынды Астана қаласындағы Назарбаев зияткерлік мектебінің «Ziatech» командасы жеңіп алды.
— Отандық оқушылардың жасанды интеллект саласындағы жетістіктерін қолдап, оларды әрі қарай жетілдіру үшін аталған олимпиаданы халықаралық деңгейге көтерген жөн, — деп атап өтті олимпиада ұйымдастырушылары.
