Мәдениет және ақпарат министрлігі ресми сайтында ата-аналардың балаларын бақылауға арналған бірнеше қосымшаның таныстырылымын жариялады. Бұл қосымшалар балалардың онлайн-әрекеттерін бақылап, олардың құрылғыларда өткізетін уақытын қадағалауға мүмкіндік береді.
Министрлік хабарламасында қазіргі таңда ақпараттық технологиялар, мобильді байланыс пен теледидардың маңызының арта түскені атап көрсетілген. Интернет тек ақпарат алу көзі ғана емес, сонымен қатар қарым-қатынас, ойын-сауық және білім беру ортасына айналған. Интернет қолданушыларының саны күн сайын өсіп, оның ауқымы кеңейіп келе жатыр. Мұнымен қатар, желідегі заңсыз контенттің саны да артты. Цифрлық әлемде балаларды интернет қауіптерінен қорғау аса маңызды мәселе ретінде қарастырылуда. Осыған байланысты мемлекеттік органдар қажетті шараларды қолға алып жатыр.
Ата-ана бақылауына арналған танымал қосымшалар:
- Kaspersky Safe Kids: сайттарды бұғаттау, геолокация, белсенділік туралы есептер.
- Dr.Web Security Space: антивирус және ата-ана бақылауы, контентті сүзу.
- Qustodio (Испания): контентті сүзу, экран уақытын шектеу, әлеуметтік желілерді бақылау.
- Net Nanny (АҚШ): контентті бұғаттау, экран уақытын шектеу және орналасқан жерді қадағалау.
- Norton Family: сайттарды сүзу, пайдалану уақытын шектеу және іздеу сұрауларын қадағалау.
- Kidslox: экран уақытын шектеу, қосымшаларды бұғаттау және орналасқан жерді қадағалау.
- Parental Control Kroha (Украина): қосымшаларды бұғаттау, веб-бақылау, белсенділікке мониторинг жасау.
- Google Family Link: Android жүйесінде белсенділікті бақылауға арналған тегін қосымша. Ата-ана мен баланың құрылғыларына орнату қажет.
- Kidlogger: белсенділікті қадағалауға мүмкіндік беретін пассивті бақылау.
- Кірістірілген мүмкіндіктер: Android үшін Google Play арқылы, iOS үшін — геопозицияны қадағалау үшін «Экран уақыты» және «Орналасқан жерді анықтау».
- TikTok Family Pairing: жасөспірімдердің TikTok қолдануын бақылау, экран уақытын шектеу және контентті сүзу мүмкіндігімен.
Бұл қосымшалар ата-аналарға өз балаларының цифрлық әлемде қауіпсіздігін қамтамасыз ету үшін тиімді құралдар ұсынады.
