Абай атындағы Қазақ ұлттық педагогикалық университетінің «6В01513 – Биология» мамандығының 3-курс студенттері Камила Мереке мен Яна Филатова биология кафедрасының доценті К.И. Батырованың жетекшілігімен Алматы хайуанаттар бағына арналған арнайы сайт жасап шықты.
Жоба Wix платформасында жүзеге асырылып, сайт жеті бөлімнен тұратын ақпараттық ресурс ретінде Алматы хайуанаттар бағындағы жануарлар туралы жан-жақты мәлімет ұсынады. Әрбір бөлімде хайуанаттар бағына тән жануарлардың түрлері туралы толық сипаттамалар беріледі. Бұл сайт келушілерге Қазақстанның ең көне зообағының фаунасы туралы сирек және ерекше түрлермен танысуға мүмкіндік береді.
Сайттың басты ерекшелігі – Алматы хайуанаттар бағының жануарлары, оның ішінде жойылып кету қаупі бар және ерекше қорғалатын түрлері жайлы ақпаратты көпшілікке алғаш рет ұсынуы. Жоба хайуанаттар бағының биоәртүрлілігі туралы мәліметтерге қолжетімділікті жеңілдетіп қана қоймай, табиғатты қорғау, экология және ғылыми зерттеулерді насихаттауға да ықпал етеді.
Бұл жоба білім беру мекемелері мен табиғатты қорғау ұйымдарының тығыз ынтымақтастығының маңыздылығын көрсетіп, студенттердің жоғары деңгейдегі кәсіби құзыреттілігі мен шығармашылық бастамасын дәлелдейді.
