Оқу-ағарту министрі мен Еңбек және халықты әлеуметтік қорғау министрінің 2024 жылғы 24 желтоқсандағы бірлескен бұйрығымен мемлекеттік білім беру ұйымдарының басшылары мен педагогтерін тағайындау және қызметтен босату ережелерінің жаңа редакциясы бекітілді, деп хабарлайды zakon.kz.
Ережеге сәйкес, мемлекеттік білім беру ұйымының бірінші басшысын тағайындау немесе қызметке қабылдау Еңбек кодексінің 139-бабының 1-тармағына сәйкес жұмыс берушінің шешімімен немесе конкурс негізінде жүзеге асырылады.
Бірінші басшыны тағайындау тәртібі
Мемлекеттік білім беру ұйымының бірінші басшысын жұмысқа қабылдау еңбек шартын жасасу және жұмыс берушінің актісін шығару арқылы жүзеге асады. Егер тағайындау конкурс арқылы жүргізілсе, оған конкурс комиссиясының оң қорытындысы негіз болады.
Мектеп директоры лауазымына үміткер келесі құжаттарды ұсынуы қажет:
- Еңбек кодексінің 32-бабының 1-тармағында көрсетілген құжаттар;
- Белгілі бір вакантты лауазымға қойылатын біліктілік талаптарына сәйкестігін растайтын құжаттар.
Конкурс кезеңдері:
- Мемлекеттік органның ресми интернет-ресурсы немесе әлеуметтік желідегі аккаунтында конкурс туралы хабарландыру жариялау;
- Конкурсқа қатысу үшін үміткерлерден құжаттарды қабылдау;
- Құжаттарды біліктілік талаптарына сәйкестігін тексеру;
- Конкурс комиссиясының үміткерлермен сұхбат жүргізуі.
Қатысу үшін қажетті құжаттар:
- Жеке куәлік немесе цифрлық құжаттар сервисінен алынған электрондық құжат;
- Кадр есебі бойынша жеке парақ және фотосурет;
- Мемлекеттік үлгідегі білім туралы құжат көшірмесі;
- Еңбек қызметін растайтын құжат көшірмесі;
- Денсаулық жағдайы туралы 075/у үлгісіндегі анықтама;
- Психикалық және наркологиялық есепте тұрмауы туралы анықтама;
- Сертификаттау туралы куәлік;
- KazTest сертификаты (B1 деңгейінен төмен емес);
- Білім беру ұйымын дамытудың перспективалық жоспары;
- Түйіндеме;
- Біліктілік санатын беру немесе растау куәлігі.
Сертификаттау талаптары:
Үміткерлерді сертификаттау білім саласындағы уәкілетті орган анықтайтын ұйым арқылы ақылы түрде өткізіледі. Сертификаттау электронды форматта жүргізіледі және 180 минут ішінде Қазақстан Республикасының білім беру саласындағы заңнамасы бойынша 48 тест сұрағына жауап беру қажет. Өту деңгейі – 50%. Сертификаттың жарамдылық мерзімі – 1 жыл.
Конкурс нәтижесі бойынша бірінші басшы 5 жыл мерзімге тағайындалады.
Мұғалімдерді қабылдау тәртібі
Педагогтарды жұмысқа қабылдау “Ұлттық деректер қоры” ақпараттық жүйесіндегі “Педагогтарды жұмысқа қабылдау” модулі арқылы жүзеге асырылады. Егер мұндай жүйе болмаса, құжаттар қағаз жүзінде қабылданады.
Конкурсқа қатысу үшін талап етілетін құжаттар:
- Конкурсқа қатысуға өтініш;
- Жеке куәлік немесе электрондық құжат;
- Кадр есебі бойынша жеке парақ;
- Білім туралы құжат көшірмесі;
- Еңбек қызметін растайтын құжат көшірмесі (бар болса);
- Денсаулық туралы 075/у үлгісіндегі анықтама;
- Психикалық және наркологиялық есепте тұрмауы туралы анықтама;
- Сертификат немесе біліктілік санаты туралы куәлік;
- Ағылшын тілі мұғалімдері үшін қосымша сертификаттар (IELTS, TOEFL немесе CELTA);
- Бағалау парағы;
- Ұсыным хат.
Конкурсты ұйымдастыру кезеңдері:
- Конкурс туралы хабарландыру жариялау;
- Конкурс комиссиясын құру және күнін белгілеу;
- Құжаттарды қабылдау және қарау;
- Үміткерлерді бағалау және сұхбат өткізу.
Бұл ережелер 2025 жылғы 7 қаңтардан бастап күшіне енеді.
