Астаналық №73 мектеп-лицейінің 10-сынып оқушысы Жайық Қилымбек күрделі есептерді шешудің түрлі жолдарын табудағы қабілетімен ерекшеленеді.
Жайық бала кезінен қиын есептерді шешуге қызығушылық танытып, математиканы ерекше сүйіп оқиды. Логикалық тапсырмалар мен қиын формулалардың тілін меңгеріп алған ол, математиканың күрделі мәселелерін шешуде жүйрік. Оған қоса, Жайық осы жолда өз жетістіктерін достары мен қатарластарына да үйретіп, оларды да математиканы тереңірек түсінуге ынталандырып жүр.
«Біздің өміріміз де есеп сияқты. Әр адам оған әртүрлі тәсілмен қарай алады. Кейбір жолдары күрделі, ал кейбіреулері жеңіл әрі түсінікті. Менің мақсатым – қиын есептерді уақытты босқа кетірмей, оңай әрі тиімді тәсілмен шешу. Бұл мен үшін жаңа бір мүмкіндік, әрі мен көптеген шешу жолдарын үйреніп, тәжірибе жинадым», – дейді жас математик.
Жайықтың логикалық ойлау қабілеті мен шешім табудағы шеберлігі оның болашағына үлкен үміт арттырады. Мектептегі ұстаздары оның осы қабілеттеріне сенім білдіріп, оған алдағы уақытта одан да биік шыңдарды бағындыруға мүмкіндік беретініне күмәнданбайды.
Индира БЕРЖАНОВА
