Алматыда Қазақ ұлттық қыздар педагогикалық университетінің 80 жылдық мерейтойы салтанатты түрде аталып өтті. Мерейтой аясында «Білімді қыздар – білімді ұлт» атты халықаралық форум ұйымдастырылып, білім мен ғылым саласына үлес қосқан ел азаматтары, университет түлектері мен профессорлық-оқытушылық құрам марапатталды.
Шара барысында университет тарихында ерекше оқиға орын алып, QyzPU-дің жаңа оқу ғимаратының ашылуы болды. Жаңа ғимараттың лентасын ҚР Ғылым және жоғары білім министрі Саясат Нұрбек, еңбек сіңірген қайраткер, университет түлегі Орынша Қарабалина және университеттің Директорлар кеңесінің төрағасы Омархан Өксікбаев қиды. Министр Саясат Нұрбек университет ұжымына ғылым мен білімге қосқан қомақты үлестері үшін алғыс айтып, арнайы марапаттар табыстады. Ол өз сөзінде университеттің тек білім ордасы ғана емес, ұлттық құндылықтарды насихаттайтын және қоғамға қызмет ететін маңызды мекеме екенін атап өтті. Сонымен қатар, педагогикалық университеттің 80 жылдық тарихы барысында осы оқу орнын бітірген түлектердің еліміздің түрлі салаларында жемісті еңбек етіп келе жатқанын сөз етті.
Мерейтойдың тағы бір маңызды сәті – университетте Пәнаралық ғылыми зертхана ашылуы болды. Химия ғылымдарының докторы, профессор Мұхамедқали Матаев және Омархан Өксікбаев жаңа зертхананың лентасын қиды. Омархан Өксікбаев университеттің тек педагог кадрлар дайындап қана қоймай, ғылымды дамытуға да зор үлес қосып отырғанын айтты. Зертхана оқыту мен ғылыми тәжірибе жинақтауға арналған, оның 70%-ы ғылыми зерттеулерге бағытталған. Бұл ғылыми орталықтың жұмысы елімізде жаңа жаңалықтардың пайда болуына себепкер болатынына сенім білдірді.
Жаңа зертханалық орталық «химия, биология және физика» бағыттары бойынша ғылыми-зерттеу жұмыстарын жүргізуге арналған заманауи құрал-жабдықтармен қамтылған. Орталықта түрлі бағытта зерттеу жүргізетін бірнеше зертхана жұмыс істейді, олардың қатарында спектрлік талдау, рентгендік фазалық талдау, жаңа материалдарды синтездеу, кванттық магнитометрия, биомедициналық зерттеулер мен биотехнология және гендік инженерия салалары бойынша зертханалар бар.
Сонымен қатар, «QyzPU Unispace» атты жаңа коворкинг орталығы ашылды, бұл жерде студенттер мен жас ғалымдар жаңа идеялар мен креативті бастамалармен жұмыс істей алады.
Мерейтой барысында QyzPU мен әлемнің жетекші университеттері арасында стратегиялық әріптестік келісімдерге қол қойылды. Университет Мичиган штат университеті мен Сассекс университетімен ынтымақтастық туралы келісім жасаса, сондай-ақ Education University of Hong Kong және Абай атындағы Қазақ ұлттық педагогикалық университетімен бірге ұстаздар біліктілігін арттыру академиясын құру туралы шартқа қол қойылды.
