18 қараша мен 25 желтоқсан аралығында елімізде 1 мыңға жуық білім беру мекемесінде халықаралық PISA зерттеуі өтуде. Бұл зерттеуге 15 жасқа толған 30 мыңнан астам оқушы қатысады.
Зерттеу PISA әдіснамасы негізінде жүргізіліп, оқу сауаттылығы, математика, жаратылыстану ғылымдары сияқты функционалдық сауаттылықтың негізгі дағдыларын бағалауды мақсат етеді.
Сонымен қатар, зерттеу білім беру ұйымдарының сыртқы бағалауын жүргізуге мүмкіндік береді. Бұл нәтижелер оқушылардың оқу үлгеріміне әсер ететін басты факторларды анықтауға бағытталған.
“Мектептерге арналған PISA зерттеуі жыл сайын жүргізіліп, әр мектепке қатысты жеке есептер ұсынады, осылайша нәтижелерді терең талдауға мүмкіндік береді. Бұл мектептерге білім сапасын арттыру мақсатында жаңа стратегиялар мен бағдарламалар әзірлеуге маңызды құрал болады. Зерттеу оқу орындарының күшті және әлсіз тұстарын айқындап, қажетті шараларды қабылдауға көмектеседі, соның нәтижесінде білім беру процесін жақсартуға ықпал етеді”, – деп атап өтті Білім беру саласындағы сапаны қамтамасыз ету комитетінің төрағасының орынбасары Майра Мелдебекова.
Айта кету керек, “Мектептерге арналған PISA” зерттеуін Экономикалық ынтымақтастық және даму ұйымы жүргізеді. 2021-2023 жылдар аралығында еліміздің 2 200 білім беру ұйымы бұл зерттеуге қатысты.
