Бүгін, 30 қыркүйек күні Ақтау қаласының 18 шағын ауданында №18-мектеп және 19 А шағын ауданында №24-мектеп пайдалануға берілді. Білім ошақтары Мемлекет Басшысының тапсырмасы бойынша «Білім беру инфрақұрылымын дамыту» қорының есебінен салынып, қолданысқа енгізілді.
Мектептерде балаларды оқыту үшін барлық жағдай жасалған.
— Мектеп ғимараттары толықтай заманауи үлгіде салынып, қажетті керек-жарақтармен қамтамасыз етілген. Мұнда спорт залдары, асхана, кітапхана, компьютер сыныптары, зертхана кабинеттері мен шеберхана, медпункт және егу кабинеті жұмыс істейді, — дейді Маңғыстау облыстық білім басқармасының басшысы Динара Жұмашева.
Маңғыстауда оқушы саны жыл сайын орта есеппен 5 мыңға өсіп отыр. Жаңа оқу жылында облыс мектептерінде 183 мыңнан аса оқушы оқуда, оның ішінде 20 мың бүлдіршін мектеп табалдырығын алғаш рет аттады.
Облыста «Білім беру инфрақұрылымын дамыту» қорының есебінен тағы екі мектеп бой көтерді. Олар Мұнайлы ауданының Басқұдық және Қызылтөбе-2 ауылдарында орналасқан. Одан бөлек, аймақта «Жайлы мектеп» жобасы аясында 21 мектеп қолданысқа берілмек.
Бұған дейін, Ақтауда оқушылардың мектептің кіреберісінде тапталып қала жаздағанын жазған едік.
