Парламент Мәжілісінің экс-депутаты Жұлдыз Сүлейменова ауыл мектептерінде оқитын балалардың Назарбаев зияткерлік мектептеріне түсуіне бөлек конкурс немесе квота енгізу қажет деп санайды.
Тағы үлкен мәселе – ауыл балаларының Назарбаев зияткерлік мектептеріне түспеуі. Әлеуметтік аз қамсыздандырылған көптеген ата-ананы білемін. Бәрі өзінің тапқан-таянғанын қанша қаражаты бар, барлығын қаладағы репетиторлық орталыққа беріп, балаларын оқуға түсіреді. Оны үлкен дайындықпен өткізеді. Ауылдық жерлерде ондай мүмкіндік жоқ. Сәйкесінше, НЗМ-ға ауылдық жерлердегі балалардың оқуға түсуіне арналған бөлек конкурстық іріктеу және квота қарастыру қажет. Былтыр Асхат Аймағамбетов екеуміз дарынды балаларға арналған ауылдық жерлердегі және әлеуметтік осал топтағы балалар квотасын (15%) енгізуді ұсынғанбыз. Асхат Қанатұлы оны қолдады. Көптеген дарынды балалрды оқытуға арналған мектептерге осы квота енді. Бірақ зияткерлік мектептердің дербес мәртебесіне байланысты бұл квота енбеді. Қоғамда бұл көп талқыланды. Дұрыс емес деп айтқан пікірлер де болды. Мен де ауыл мектебінің түлегімін. Біздің кезімізде ауыл мектептері мықты болды. Бүгінгі таңда ауыл мектептерін дамытуға күш салып жатырмыз. Алайда ауылда туып-өскен көпбалалы, жалғызбасты ата-аналар, әлеуметтік осал топтағы балаларға НЗМ-ға түсудің әлеуметтік лифт механизмін қоғам болып жасауымыз керек, — деді Жұлдыз Сүлейменова.
