Назарбаев Университеті инновациялық кластерінің стартаптарына арналған Demo Day өтті. Іс-шарада инкубация және акселерация нәтижесі бойынша 23 стартап ұсынылып, ең үздік үшеуіне 2 млн теңгенің гранты бөлінді.
NURIS бизнес-инкубациялау және акселерация бағдарламасының түлектері жетістіктерін көрсетті. Атап айтқанда, E-Commerce, Education & HR, AgriTech және HealthTech салаларындағы мәселелердің шешімдерін 23 стартап арқылы ұсынды. Сондай-ақ Demo Day жаңа байланыстарды табуға және серіктестік орнатуға бағытталған 100-ден астам қатысушыны біріктірген тиімді коммуникация алаңына айналды. Іс-шараға 50-ге жуық ұйым, оның ішінде ұлттық компаниялар, венчурлық қорлар, халықаралық консалтингтік ұйымдар, банктер, университеттер, бизнес-қауымдастықтар, ірі компаниялар қатысты.
«Инкубация – ерте кезеңдегі стартаптарға қолдау жасайтын бағдарлама, ал акселерация өсу, әрі қарай даму, шетелдерге шығу, инвестициялау қажет болған стартаптарға қолдау көрсетуді қамтиды. Бізге идеямен келіп, 3 ай ішінде белгілі бір бизнес туралы тренингтерге қатысып, эксперттердің, Назарбаев Университетінің профессорларынан ақыл-кеңес алады. Сонымен қатар бизнес мамандарымен жеке кездесу ұйымдастыру арқылы өз жобаларын жетілдіріп, дамытады. Бүгінде міне, кейбіреулері алғашқы сатылымға жетті, ал кейбіреулері өздерінің прототиптерін жасап, инвесторларға және өзінің серіктестеріне ұсынып отыр. Инкубация жобасы аясында ең үлкен жетістіктерге жеткен үздік стартаптарға NURIS өз атынан 2 млн теңгеге дейін қаржылай қолдау көрсетті», деді NURIS бизнес-инкубаторының менеджері Арнагүл Қабыкен.
Грант ұтып алғандардың қатарында Елнұр Қайнарбек, Дмитрий Нам және Алтынгүл Тайбасарова бар. Е.Қайнарбек ойлап тапқан GoDays қосымшасы пайдаланушылардың өнімділігін арттыруға көмектеседі. Ал Д.Нам жетекшілігімен жасалған B2B нарығы – А2optics стартапы оптикаға арналған.
Үшінші жеңімпаз, BALAM мобильді қосымшасын жасаған А.Тайбасарованы сөзге тартқан едік. Ол екі баланың анасы, мектепке дейінгі білім беру саласында еңбек етеді. Алтынгүл балабақшадан алған тәжірибесі арқылы балабақша әкімшілігі мен тәрбиешілердің, ата-аналардың кез болатын мәселелерімен таныс. Осы мәселелердің инновациялық шешімі ретінде Алтынгүл және оның тобы BALAM мобильді қосымшасын ойлап тапты.
«Бұл мобильді қосымша қазіргі барлық балабақша мәселесін шешеді. Біріншіден, балабақшада істейтін әрбір қызметкер күніне 2 сағатын тек қана ата-аналармен әлеуметтік желіде хат алмасу үшін, сонымен қатар қағаз жұмыстарына жұмсайды. Осылайша, балаға тиісті көңіл бөлінбейді. Екіншіден, өте көп баланың аллергиясы бар. Балабақшада бұл ақпарат әртүрлі жерде сақталады және тәрбиеші назарынан тыс қалуы да мүмкін. Соның салдарынан бала денсаулығына зиян келеді. Ал мектепке дейінгі ұйымның беделіне теріс әсер етеді. Біздің мобильді қосымша осы мәселенің бәрін шешіп, балабақшаға: ата-аналармен қарым-қатынасты жақсартуға; ата-аналардың қанағаттану деңгейін екі есе арттыруға; оқушылар туралы барлық маңызды ақпаратты бір жерде сақтауға мүмкіндік береді. Осы күні біз Нұр-Сұлтанның 3 балабақшасында қосымшаның жобалық нұсқасын іске қостық, тағы 5 балабақша қосымшаның жүргізілуін күтіп отыр. Болашақта бұдан да көп мекеме бізге қосылады деп үміттенеміз», деп бөлісті А.Тайбасарова.
Бұдан бөлек тағы 3 стартап «Ең үздік инновациялық шешім», «Ең үздік питчер» және «Ең үздік дизайн» аталымы бойынша ынталандыру сыйлығын иеленді.
Аружан НАҒАШЫБАЙ,
Л.Н.Гумилев атындағы Еуразия ұлттық университетінің студенті
