Жазғы уақыттағы маңызды жұмыстардың бірі – балалардың демалысы мен сауықтырылуын ұйымдастыру. Жазғы демалыс және сауықтырумен 1-10 сыныптар аралығындағы балардың 85,3% қамтылатын болады. Бұл туралы ҚР Оқу-ағарту министрі Ғани Бейсембаев Үкімет отырысында айтты.
«Бұл –2,8 млн. баланы құрайды. Оның ішінде 500 мың жекелеген санаттағы отбасы балалары бар. Қазіргі таңда лагерлерде балаларды қабылдауға дайындық жұмыстары қызу жүргізіліп, аяқталуға жақын», -дейді министр.
Каникулды асыға күткен балаларымызға қала сыртындағы 218 (118 — мемлекеттік, 100 — жеке), және 10,2 мың мектеп жанындағы, профилдік және шатырлы лагерлер есігін айқара ашатын болады.
Ең көп лагерлер саны: Батыс Қазақстан, Алматы қаласы және Шығыс Қазақстан – 19, Алматы облысы – 18, Түркістан облысы – 16.
Қала сыртындағы лагерлердің ең аз саны: Ұлытау облысында жоқ, Астана қаласы-2, Маңғыстау облысы-3, Шымкент қаласы-3.
Бұдан бөлек, министрдің айтуынша оқушыларға дәстүрлер мен мәдени құндылықтармен танысуға мүмкіндік беретін «Этноауыл», «Жаздық жолдама» жобаларын іске асыру, жетекші университеттер жанындағы жазғы және олимпиадалық резерв мектептері жұмысы көзделген.
«Сонымен қатар, жаз мезгілінде 1,4 млн бала қосымша білім беру мекемелеріндегі секциялар мен үйірмелерге қатысады. Осы мақсатта білім беру ұйымдарында ғылыми-техникалық, музыкалық, көркемдік, экологиялық, туристік және басқа да бағыттардағы 11 мың үйірмелер жұмыс істейді.
Балалар «Жасыл ел» бағдарламасы шеңберінде көгалдандырумен шұғылданады, еліміздің киелі жерлеріне саяхаттайды, спорттық жаттықтыру жиындарында шынығады, тілдік курстармен қамтылады», — деп түйіндеді Оқу-ағарту министрі Ғани Бейсембаев.
