21 мамырдан бастап Qazaqstan Ұлттық Телеарнасынан «Дара» ұлттық білім бәйгесі эфирге шығады, деп хабарлайды QAZBILIM ақпараттық агенттігі Qazaqstan телеарнасына сілтеме жасап.
Бүгін еліміздегі ең үздік 28 жоғары оқу орнынан келген 32 команда арасындағы интеллектуалдық сайыстың түсірілімі басталды.
Ұлттық телевизиялық білім бәйгесінде елдің әр аймағындағы 15 қаладан жиналған жалпы саны 200-ге жуық студент бақ сынайды.
Телевизиялық жоба түрлі бағыттар бойынша «Кім жылдам?», «12», «Жұмбақ жәшік» кезеңдерінен тұрады.
Әр кезең бойынша қойылатын сұрақтардың салмақтылығын, дұрыс-бұрыстығын тексеруге Ұлттық тестілеу орталығы да атсалысты. Жаңа жобаның мақсаты – білім алушыларға өз мүмкіндігін таныту үшін интеллектуалдық алаң ұсыну және жастарды оқу, білімге ынталандыру.
Бағдарламаны Ерқанат Көпжасарұлы мен Алла Гаврина жүргізеді. «Дара» интеллектуалдық тележобасын 21 мамырдан бастап әр жексенбі 20:50-де көре аласыздар.
