Бүгін «QazBilim» орталығы жыл басы саналатын Наурыз мейрамын атап өтті. Білім ордасы келген мейманды ұлттық мейрамымыздың сипатына сай әсем әуен, күмбірлеген күй және мол дастарханмен қарсы алды.
Айналаңда ұлттық киім киген білімге жаны құмар ұстаздар мен балалар. Сыңғырлаған күлкі, түрлі жарыстар мен ойындар. Білім ордасындағы саналы жас ұрпақтың бүгінгі көңіл күйі осындай. Аятжан Ахметжан бастаған ел ағалары, қоғам белсенділері мен ұстаздар жүрекжарды тілектерін айтып, сөз сөйледі.
Басшылықтың айтуынша, білім ордасы басқа мерекелерге қарағанда Ұлыстың күніне ерекше назар аударады.
«Наурыз — «QazBilim» ортылығында аталып өтетін бас мерекелеріміздің бірі. Тәуелсіздік күні мен Наурызды оқушылар мен ұжым болып, жақсы атап өтеміз. Наурызды асыға күтіп, ерекше көңіл бөлеміз», — деді орталықтың директоры Гүлбану Қанай.
Оған қоса, мерекелік шараның ерекшеліктерін атап өтті.
«Оқушылар өз өнерін көрсетеді, түрлі ойындар ойнатылады. Арқан тартыс, тоғызқұмалақ сияқты ойындар, кір тасын көтеруден жарыс және Наурызға байланысты сұрақ-жауап болады. Оқушыларға барынша мерекеге сай көңіл-күй сыйлауға тырысамыз», — дейді «QazBilim» директоры.
Расында оқушылар бұл күні ерекше көтеріңкі көңіл-күйде екені бірден байқалды. Білім-ілімге құштар жастардың бұл мейрамды ұлықтап, лайықты атап өтеміз деген дайындықтары сезілді.
«Мен осы орталықта қыркүйек айынан бастап білім алып жүрмін. 6-7 ай болып қалды. Бұл орталық ең бірінші сапалы білім беретіндігімен ұнайды. Ұстаздарымыз өте білімді, тақырыпты жақсы түсіндіреді. Мектепте түсінбегенімізді осы жерде естеқаларлықтай етіп түсіндіреді. Балалар да білімге құштар, өте қарапайым, бауырмал. Мектепте тек дастархан басында шай ішіп атап өтсек, бұл жердегі Наурыз мүлде басқа атмосфера сыйлайды. Мол дастархан жайылды. Енді ән-би шашу болады, бізді қызықты ойындар күтіп тұр», — деді оқушы, Ақбота Толтаева.
Айдарбаева МАРЬЯ
