Оқу-ағарту министрлігі Білім саласындағы сапаны қамтамасыз ету комитетінің төрағасы Ернұр Дәуенов өзінің Facebook парақшасында комитетке педагогтерден арыз-шағымдар жиі түсетінін жазды.
Соңғы уақытта тексерістер, мониторингтер, әдістемелік көмек көрсету сияқты әр түрлі формадағы бақылау шаралары туралы көп айтылуда. Тіпті біздің Комитет пен департаменттерге еліміздің көптеген өңірлерінен арыз-шағымдар жиі келіп түсуде. Әсіресе, Алматы облысының педагогтерінен.
Осы бағыттағы жұмысты жүйелендіру мақсатында барлық бақылау шараларының Концепциясын әзірлеуді шештік. Концепцияда бақылау шараларының түрлері, мақсат-міндеттері, бақылау инструменттері, әдіс-тәсілдері және алгоритмі жазылатын болады.
Осыған орай, Білім басқармаларына Концепция бекітілгенге дейін барлық бақылау шараларын тоқтату туралы тапсырма берілді. Құжат қабылданғаннан кейін жүйелі жұмысты бастаймыз.
Алайда, білім саласында сапаны қамтамасыз ету департаменттерінің негізгі функциялары болып табылатын мемлекеттік аттесттатау, профилактикалық бақылау шаралары жалғаса береді.
Кез келген мәселеде жүйелілік қажет.
Ернұр Дәуеновтің Facebook парақшасынан
