Мұндай пікірді «Ұлыссұхбатта» Парламент Мәжілісінің экс-депутаты Жұлдыз Сүлейменова білдірді
«НЗМ-ға байланысты сыни пікірлер көптеп айтылып жүр. 2012 жылдан бастап арнайы дербес білім беру ұйымдарының мәртебесін анықтайтын заң қабылданғаннан бастап сын арагідік айтылып тұрды. Қазіргідей әлеуметтік наразылық тудыратын сын 1-2 жылда белең алып тұрғанын мойындау қажет. Иә, ол мектептерде 10 жылға жуық қызмет еттім. Қарапайым менеджерден бастап, Алматы қаласындағы физика-математика бағытындағы зияткерлік мектеп директорына дейінгі жолды жүріп өттім. Зияткерлік мектеп жалпы қарапайым қазақ балаларын, оның ішінде дарынды балаларын іріктеп алып, оларға әлемдік деңгейдегі, кәсіби деңгейде бәсекеге қабілетті, өте сапалы білім беретін халықаралық деңгейдегі ұйым ретінде өзін мойындатты. Оны жыл сайын конкурсқа іріктеуге балаларын алып келіп жүрген ата-аналардан-ақ көруге болады. Экс-депутат ретінде айтарым, иә, республикалық бюджеттен бөлінетін қаражат қомақты. Сонымен қатар, бұл – мемлекеттік мекеме. Негізгі құрылтайшысы – ҚР Үкіметі. Бөлінетін қаражат – халықтың қаражатынан, сіз бен біздің салығымыздан бөлінетін республикалық қаражат. Осы ретте, менің ойымша, жұмсалған қаражат туралы халықтың арасында, тіпті, сараптамалық медиа порталдарда сараптамалық материалдар жоқ. Менің ойымша, Жаңа Қазақстан, Әділетті Қазақстан құрамыз десек, онда осы зияткерлік мектептерге кетіп жатқан қаржы толыққанды халықтың алдында, оның негізгі құрылтайшысы – ҚР Үкіметі ашық айту керек. Өзім мектеп директоры болғандықтан, нақты білетінім, қаражат екі бағытта бөлінеді. Біріншісі – НЗМ-ді дамытуға арналған қаражат, үлкен қомақты қаржы. Екіншісі – білім беру бағдарламаларын жүзеге асыруға, яғни грантпен оқуға түскен балалардың сапалы білім алуына бөлінетін қаражат», — деді Жұлдыз Сүлейменова.
