Шығыс Қазақстан облысында 5 мектеп шұғыл жөндеуді қажет етеді. Шемонаиха мен Риддер қалаларындағы кейбір білім ордалары 1935-1936 жылдары салынған.
Өңірде 344 мемлекеттік мектеп бар, олардың ең ескісі 90 жыл бұрын салынған. Ал Шемонаиха қаласындағы Теміржол шағынауданындағы мектеп биыл 88 жылдығын атап өтті. Аталған мектептің жағдайы өткен уақыттың әсерінен айқын көрінеді: қабырғалар, төбелер мен баспалдақтар ескірген, бұл әрине, оқушылардың жайлы білім алуына кедергі келтіріп отыр.
Мектеп директоры Назигүл Тотекина:
– Біз ғимараттың сыртқы түріне назар аудармаймыз. Мектебіміз жасы үлкен болса да, ішкі жағдайы жақсы. Бұл мектеп 1936 жылы теміржол бекеті жұмысшыларының балаларына арналған. Бірақ 88 жылда көптеген нәрсе ескірді. Бізде асхана жоқ, сондықтан тамақтандыру үшін бірнеше кабинетті біріктірдік. Медициналық кабинеттен бастап, жуынатын бөлмелерге дейін өз күшімізбен жасалған, – дейді.
Мектепте қазір 360 бала білім алуда. Бірақ бұл мектеп тек 200-ден астам оқушыға арналған. Оның үстіне, екі кішкентай жуынатын бөлмеде ғана дәретхана бар. Акт залы жоқ, сондықтан барлық іс-шаралар спортзалында өтеді. Бірақ спортзал да талаптарға сай емес, ол жоғарғы қабатта орналасқан, бұл өте ыңғайсыз.
9 сынып оқушысы Никита Рейзвих:
– Бұл өте қиын. Спортзалдың астындағы кабинеттердің мұғалімдері жиі шағымданады, өйткені балалар жүгірген кезде қабырғалар мен төбелер дірілдейді. Спортпен айналысу кезінде жүгірмей бола ма? Қосымша жарыстарға тек кешкі уақытта дайындала аламыз, – дейді.
Шемонаиха мектебіндегі ең үлкен мәселе – оқушылар санының көптігі. Мектеп тар болғандықтан, оқушыларға орын жетіспейді. Сондай-ақ, Риддер қаласындағы №12 мектептің де жағдайы сын көтермейді. 90 жылдық тарихы бар бұл мектепте спортзал жертөледе орналасқан, ал балалар темір баспалдақпен төмен түсуге мәжбүр. Ылғалдан қабырғалар көгеріп, жөндеу жұмыстарын жүргізуге қарамастан, нәтиже жоқ.
Риддер қалалық білім бөлімінің басшысы Любовь Микульская:
– Біз жөндеу жұмыстарын жүргізіп келеміз, бірақ көгерген қабырғалармен үнемі күресу өте қиын. Бұл балалардың денсаулығына зиян келтіруі мүмкін, – дейді.
Тағы бір ескі ғимарат – №9 мектеп. Мұнда ескі орыс тілі кабинеті спортзал ретінде пайдаланылады. 38 шаршы метрлік бөлмеде спортпен 240 оқушы кезекпен айналысады. Сонымен қатар, ұстаздарға да бөлмелер жетіспейді. Аядай кабинетте екі меңгеруші, әлеуметтік педагог, инспектор мен аға-кеңесші отырса, басқа бөлмелерде тәрбиеші мен дефектолог жұмыс істейді.
Бұл мәселелерді шешу үшін өңірде түбегейлі шаралар қолға алынуда. «Жайлы мектеп» жобасы аясында жаңа мектептер салынып, апатты жағдайдағы мектептердің оқушылары соларға көшіріледі.
Любовь Микульская:
– Риддерде соңғы мектеп Кеңес үкіметі кезінде 1973 жылы салынған. 2022 жылы №11 мектеп ашылды. Біз ескі мектептерді жөндеуге тырысып жатырмыз, бірақ балалар заманға сай жағдайлармен білім алуы тиіс. Сондықтан 600 орындық жаңа мектеп салынбақ. №12 мектептен 250, №9 мектептен 240 оқушы жаңа ғимаратқа көшеді, – дейді.
Шемонаиха қаласында жаңа мектептің құрылысы аяқталуға жақын. Мердігерлер оны қараша айының ортасында пайдалануға беруі мүмкін, яғни 31 желтоқсанға жоспарланғаннан бұрын.
Шемонаиха ауданы әкімінің орынбасары Бақытжан Молдаханов:
– Құрылыс жұмыстары 95%-ға аяқталды. Балалар жаңа жылдық мерекелерін ескі спортзалда емес, жаңа акт залында қарсы алса деген үміттеміз, – дейді.
Қазіргі уақытта өңірде «Жайлы мектеп» ұлттық жобасы аясында 10 мектептің құрылысы жүріп жатыр. Өскеменде 3, Шемонаиха мен Риддерде бір-бірден, Глубокое ауданында екі мектеп ашылуы жоспарлануда.
