Мектептерде тамақтанудың жаңа стандарты әзірленеді. Бұл туралы Денсаулық сақтау министрі Ақмарал Әлназарова хабарлады.
Ақмарал Әлназарова мектептегі тамақтану мәселелері бойынша Оқу-ағарту министрі Ғани Бейсембаев пен министрліктің әріптестерімен және ЮНИСЕФ ұйымының қолдауымен талқылаулар өткізілгенін айтты. Министрдің айтуынша, Мемлекет басшысының тапсырмасы бойынша екі жылдан бері 1-4 сынып оқушыларына тегін тамақтану қызметі ұсынылып келеді, бұл үшін жыл сайын 175 млрд теңгеден астам қаржы бөлінеді.
Ақмарал Әлназарова қазіргі таңда келесі қадамды жүзеге асыру маңызды екенін атап өтті: еліміздің барлық мектептерінде балалардың сапалы, теңдестірілген және қауіпсіз тамақтануын қамтамасыз ететін жаңа стандартты әзірлеу.
“Тамақтану – бұл физикалық дамудың негізі ғана емес, сонымен қатар адам капиталының қалыптасуындағы маңызды фактор. Қоғамның болашағы қазір қалыптасып жатыр, ал оқушылардың денсаулығы мен бәсекеге қабілеттілігі олардың қалай тамақтануына байланысты болады”, – деп атап өтті министр.
Сонымен қатар, Ақмарал Әлназарова балаларда дұрыс тамақтану әдеттерін ерте жастан қалыптастырудың маңыздылығын атап өтті. Бұл олардың денсаулығы мен болашақ сынақтарға дайын болуына әсер етеді. “Біздің мақсатымыз – өңірге қарамастан, әр бала күн сайын қажетті ақуыз, дәрумендер мен қоректік заттардың теңдестірілген мөлшерін алуы. Әрбір ата-ана баласының өсуі мен дамуы үшін ең жақсысын алатынына сенімді болуы тиіс”, – деді министр.
